Gjykata e Posaçme kundër Korrupsionit dhe Krimit të Organizuar (GJKKO) ka kaluar për gjykim dosjen që lidhet me vrasjen e Fatbardh Licit.
Avokatët mbrojtës të të pandehurve Safet Bajri, Behar Bajri, Astmer Bilali dhe Eria Ago kishin kërkuar pushimin e çështjes ose kthimin e akteve për plotësim hetimesh, duke argumentuar se më herët hetimet për këtë rast ishin pezulluar nga prokurori të tjera për mungesë provash.
Sipas Prokurorisë së Posaçme (SPAK), Safet Bajri është arrestuar më 21 shkurt 2025, i dyshuar se në bashkëpunim me Astmer Bilalin dhe Behar Bajrin kanë organizuar dhe kryer vrasjen me paramendim në kuadër të një grupi të strukturuar kriminal. Ndërsa Eria Ago dyshohet se ka drejtuar një nga automjetet e përdorura gjatë ngjarjes.
Gjithashtu, sipas SPAK, motivi i dyshuar i ngjarjes lidhet me një konflikt të mëparshëm, ku Behar Bajri dyshonte se Ibrahim Lici, i shpallur në kërkim, ishte i përfshirë në vrasjen e një personi tjetër në vitin 2018.
Si ndodhi ngjarja
Fatbardh Lici, 53 vjeç, u vra mëngjesin e 10 gushtit 2018 në lagjen Kiras, në Shkodër, ndërsa ndodhej në një lokal. Sipas të dhënave hetimore, ai u qëllua me armë zjarri nga një person që dyshohet se u largua me një automjet pa targa.
Pas kësaj ngjarjeje, hetimet kanë ngritur dyshime për përplasje mes grupeve rivale.
Shënim nga GJKKO: Personat e përmendur janë të pandehur dhe konsiderohen të pafajshëm deri në një vendim të formës së prerë nga gjykata.