Gjykata e Posaçme kundër Korrupsionit dhe Krimit të Organizuar (GJKKO) ka dënuar pesë anëtarë të një grupi kriminal nga Shkodra, të akuzuar për kultivim, prodhim dhe shitje të lëndëve narkotike. Në total, gjykata ka dhënë 59 vite e 6 muaj burg për të pandehurit.
Të arrestuar në vitin 2023, të pestë personat, të gjithë banues në Shkodër, akuzohen se në kuadër të një grupi të strukturuar kriminal kishin kultivuar rreth 10 mijë bimë kanabisi.
Vendimi u dha nga trupi gjykues i përbërë nga gjyqtarët Erjon Çela, Flora Hajredinaj dhe Bib Ndreca, ndërsa gjykimi u zhvillua me procedurën e gjykimit të shkurtuar, që uli me një të tretën dënimet përfundimtare.
Sipas vendimit të gjykatës, dënimet e dhëna janë:
- Arben Shpati – 13 vite burg (përfundimisht 8 vite e 8 muaj)
- Pavlin Shpati – 10 vite e 6 muaj burg (përfundimisht 7 vite)
- Aleksandër Rrasa – 12 vite burg (përfundimisht 8 vite)
- Jeton Kacoli – 12 vite burg (përfundimisht 8 vite)
- Kristjan Plepaj – 12 vite burg (përfundimisht 8 vite)
Të pandehurit u shpallën fajtorë për veprat penale “Kultivim i bimëve narkotike”, “Prodhim dhe shitje e narkotikëve” dhe “Grup i strukturuar kriminal”.
Gjykata vendosi që dënimet të vuahen në burgje të sigurisë së lartë, ndërsa provat materiale të sekuestruara do të ruhen për llogari të procedimeve të tjera.
Palët kanë të drejtë të ankimojnë vendimin brenda 15 ditëve në Gjykatën e Posaçme të Apelit për Korrupsionin dhe Krimin e Organizuar.
