Shqipëria renditet ndër vendet me barrën më të lartë të shpenzimeve direkte për shëndetin në rajon, duke reflektuar mungesë stabiliteti në mbrojtjen financiare që shteti u ofron familjeve për shërbimet bazë. Ky është përfundimi kryesor i anketës “Securimetri 2025”, realizuar nga Këshilli i Bashkëpunimit Rajonal.
Sipas të dhënave zyrtare, rreth 57% e familjeve shqiptare deklarojnë se shpenzojnë nga 1% deri në 10% të të ardhurave të tyre totale për vizita mjekësore dhe barna. Kjo përqindje përfaqëson shumicën dërrmuese të popullsisë dhe është më e larta në të gjithë Ballkanin Perëndimor për këtë kategori.
Në kontrast me Shqipërinë, në vende fqinje si Bosnja dhe Serbia, një pjesë më e madhe e qytetarëve mbulohen nga skemat publike të shëndetësisë me kosto minimale. Ndërsa në Shqipëri, thuajse çdo kontakt me sistemin shëndetësor shoqërohet me shpenzime që rëndojnë drejtpërdrejt buxhetin familjar.
Edhe më shqetësues mbetet fakti se 27% e familjeve shqiptare shpenzojnë mbi 10% të të ardhurave të tyre për shëndetin, një nivel që Organizata Botërore e Shëndetësisë e konsideron kritik, pasi rrezikon varfërimin e shtresave të mesme dhe të ulëta.
Megjithëse vende si Serbia (34%) dhe Kosova (32%) kanë përqindje më të larta në këtë kategori ekstreme, struktura e shpenzimeve në Shqipëri tregon një shtrirje më të gjerë të barrës financiare pothuajse në të gjithë shoqërinë.
Ajo që e bën situatën në Shqipëri veçanërisht problematike është numri shumë i ulët i familjeve që nuk paguajnë pothuajse fare për shëndetin. Vetëm 9% e familjeve arrijnë të mbajnë shpenzimet shëndetësore nën nivelin 1%, përqindja më e ulët në Ballkanin Perëndimor, ku mesatarja rajonale është 13%. Kjo sugjeron se mbulimi “falas” mbetet më shumë një premtim sesa një realitet i prekshëm.
Analistët theksojnë se ky trend tregon nevojën urgjente për rishikimin e listës së barnave të rimbursueshme dhe përmirësimin e menaxhimit të sistemit shëndetësor parësor.
Në kushtet kur pagat përballen me inflacion të lartë, fakti që mbi 84% e popullsisë paguan shuma të ndjeshme nga xhepi për shëndetin e vendos sigurinë sociale të vendit në një pozicion tejet vulnerabël. Kostoja e shëndetit pritet të mbetet një nga pengesat kryesore për rritjen e mirëqenies së familjeve shqiptare edhe në vitet e ardhshme.
Burimi: Monitor